您的位置:首頁/新聞/「萬人台」台慶得200友 網民譏「熱狗」等滅亡
「萬人台」台慶得200友 網民譏「熱狗」等滅亡
2017年11月14日 10:28    稿件來源:文匯報

  上星期六除咗係“光棍節”、“雙十一”,或者係有啲人堅持嘅Remembrance Day(和平紀念日)之外,仲係“熱狗”喉舌《熱血時報》5周年台慶,佢哋當晚搞咗個“匯演”,全台總動員做吓馬騮戲娛賓咁啦。不如估吓號稱“萬人台”嘅《熱時》,搞呢場“大騷”可以吸引到幾多人出席?打個半價,5,000個?兩折,2,000個?係兩折之後再一折呀!有網民用“熱狗”影低嘅相點人頭,得出嚟嘅結果各有不同,大概係150個到250個左右,但結論幾乎一樣,就係得咁少人科水畀“熱狗”使,距離“熱狗”滅亡之日不遠矣! ■香港文匯報記者 陳庭佳

  唔知要笑佢哋定讚佢哋有自知之明啦,《熱時》當晚租嘅九龍灣國際展貿中心嗰個場,最多都只係容納600人,但最弊係到上星期四開騷前兩日,啲飛都去唔晒,於是上星期六班花生友喺網上掃完貨之後,就??吓《熱時》台慶有幾多人去做餘興節目嘞。

  “皇后”被摷“黑歷史”

  黐開狗主(黃毓民)嘅“無敵神駒”仇思達,通常會喺星期六晚11點左右做直播,但當晚佢就推前到9點半就會吓班“益友”,即係同《熱時》打吓對台賀吓吤x“罄”咁話。神駒仲摷返“皇后”殘獸胃(陳秀慧)嘅一段“黑歷史”出嚟:上年7月、狗主仲未同“熱狗”反面之前,殘獸胃打過電話上去神駒個直播,仲猛咁擦神駒鞋,喺度話“哎呀,我好開心呀!竟然可以打電話過嚟”、“我第一次打電話過嚟,好高興呀可以phone in(接通電話),因為神駒好多人聽呀!”

  正當成班“熱狗”亢奮到不停喺facebook打卡時,冷不提防班“益友”用佢哋嘅大合照嚟“點算法定人數”。其中“JoJo Wu”認真到用上兩個版本嘅合照,先用係狗達(黃洋達)同蟲泰(鄭松泰)嘅自拍,再用更加反映到實況嘅全景相,仲用埋小畫家圈人頭,結果幅自拍就有185人左右,全景相扣埋工作人員、攝影師同表演嘉賓就有215人左右。神駒當然笑到黐咗線啦,“‘益友’用紅圈計數,原來‘熱狗’(《熱時》)台慶得嗰200人,真係笑×死人!”

  黐開“熱狗”嘅網上遊魂“藍鳳凰”,當晚就上載咗幾幅睇落好墟冚嘅相,話出席人數明顯多過狗主個網台“MyRadio”台慶幾倍,“睇怕黃毓民應該激到爆血管”。不過,自稱熟悉心理學、人稱“Sam理專家” 嘅“Sam Yiu Tong Wong”就同佢計數,話“MyRadio”台慶擺咗90圍,“每圍當10人就起碼900人,如果‘熱狗’(《熱時》)台慶個會場‘話’仲多人,已超過個場可容納人數,即係可能已經違反消防條例,隨時須要負上法律責任。作大定犯法,是但認一樣嘞。”唔知係咪咁,“藍鳳凰”之後摺埋咗個帖文。

  聊天室萬幾人 幾百人買飛

  當時少人到連“熱狗”都有微言。有份製作節目《大香港早晨》嘅梁湘傑,當時就喺fb度呻“萬幾人喺chatroom(網上聊天室),得嗰幾百人買飛”。

  狙擊“熱狗”不遺餘力嘅fb專頁“香港癲佬力量”,就“通緝”三個富貴“熱狗”:畀錢貼老公“葉政淳”嘅“天蓬元帥”Peggy Yip、聽傻根(陳云根)老點賣樓嘅“水晶姥姥”李婉文、揸住幾層樓收租嘅“霍由佳”鍾雪兒,寸《熱時》點解唔搵三個富婆上台捐錢,“起碼都揼返過百萬課金啦!整個支票捐贈儀式,大家都開心呀!”

  去到噚日,神駒仲未肯放過“熱狗”,拎咗幅《熱時》台慶前拜神嘅相,同殘獸胃晒一大碟海鮮拼盤出嚟嘅相做對比:“‘熱狗’判監當日,兩公婆就叫到成枱海鮮‘食清淡啲’;‘熱狗’(《熱時》)台慶,兩公婆就買得嗰兩盒燒肉,等班傻仔食得清淡啲,真係縮骨。”

  《熱時》台慶 網民贈慶

  Chow Ivan:另外嗰9,800人呢?

  Jim Ng:每個主持點都有兩張免費飛啩,咁當有30個主持,點都有60個(用)免費飛入場啦,實際買嘅人最多百幾。

  Kik Can:越數越少,你哋好衰㗎,等陣扣返幾十個工作人員,咪百五(人)?你哋好殘忍呀!

  Sammie Chung:應該有五分四係成員同家屬,所以兩公婆應該蝕到入肉。

  李噝噝:有啲去咗廁所食飯同踎低隨地大便的你都無計,加埋應該有一萬人!

  Chris Ho Ho:×,仲有幾百(個)無影相怕上鏡啫,又有幾十(個)去咗廁所,最後又有幾十或者一百(個)臨時有事、病咗,咪好似好少囉。

  Whelan Chan:肯科水嘅死忠得返兩百,“熱狗”滅亡之路不遠矣。

  Lam ChiKit:古有斯巴達300,今有“熱狗”200。

  Gary Ka Kit:200人,仲少過我哥結婚擺酒。

  Ling Siu:上次“MyRadio”台慶擺咗成90圍,我當每枱坐10個人,都900人啦,“熱狗”個場就算塞爆都無咁多人,有咩可能會多得過“MyRadio”台慶人數呀?

  Calvin Chan:九展咁大點解要迫埋喺一段,好心畀大家坐得舒服啲,一人用幾個位都坐唔晒。

  WK Kung:唔知表演者使唔使自己買飛呢?

  映月音符:期待下年睇“熱狗”(《熱時》)6周年會喺美羅(《熱時》辦公室)搞。

  資料來源:facebook

  整理:香港文匯報記者 陳庭佳

評論